కాలభైరవాష్టకం స్తోత్రము మరియు అర్ధము

శ్రీ ఆదిశంకరాచార్యులు రచించిన

కాలభైరవాష్టకం స్తోత్రము మరియు అర్ధము

దేవరాజ సేవ్యమాన పావనాంఘ్రి పంకజం l
వ్యాళయజ్ఞ సూత్ర మిందు శేఖరం కృపాకరమ్ ll
నారదాది యోగిబృంద వందితం దిగంబరం l
కాశికాపురాధి నాథ కాలభైరవం భజే ll 1 ||
అర్దం:-
ఇంద్రుడు పూజించు పాదపద్మములు కలవాడు, పామును యజ్ఞోపవీతముగా దాల్చినవాడు, తలపై చంద్రుణ్ని అలంకరించుకున్నవాడు, దయ చూపించువాడు, నారదుడు మొదలైన యోగులచే నమస్కరింపబడువాడు, దిగంబరుడు, కాశీనగరమునకు అధిపతియైన కాలభైరవుని సేవించుచున్నాను. (1)


భానుకోటి భాస్వరం భవాబ్దితారకం పరం l
నీలకంఠ మీప్సితార్ధ దాయకం త్రిలోచనమ్ ll
కాలకాల మంబుజాక్ష మక్షశూల మక్షరం l
కాశికాపురాధి నాథ కాలభైరవం భజే ll 2 ||
అర్దం:-
కోటి సూర్యులవలే ప్రజ్వలించువాడు, సంసారసముద్రమును దాటించువాడు, ఉత్తముడు, నీలకంఠుడు, కోరికలు తీర్చువాడు, మూడు కన్నులవాడు, యమునికే యముడైన వాడు, పద్మముల వంటి కన్నులు కలవాడు, నాశములేనివాడు, స్థిరమైనవాడు, కాశీనగరమునకు అధిపతియైన కాలభైరవుని సేవించుచున్నాను. (2)


శూలటంక పాశదండ పాణిమాది కారణంl
శ్యామకాయ మాదిదేవ మక్షరం నిరామయమ్ ll
భీమవిక్రమం ప్రభుం విచిత్ర తాండవప్రియం l
కాశికాపురాధి నాథ కాలభైరవం భజే ll 3 ||
అర్దం:-
శూలము - టంకము - పాశము - దండము అను ఆయుధములను చేతులతో ధరించినవాడు, అన్నిటికీ ఆదికారణమైనవాడు, నల్లని శరీరము కలవాడు, ఆదిదేవుడు, నాశము లేనివాడు, దోషములంటనివాడు, భయంకరమైన పరాక్రమముకలవాడు, సమర్థుడు, విచిత్రమైన తాండవమును ఇష్టపడువాడు, కాశీనగరమునకు అధిపతియైన కాలభైరవుని సేవించుచున్నాను.(3)


భుక్తిముక్తి దాయకం ప్రశస్తచారు విగ్రహం l
భక్తవత్సలం స్థితం సమస్తలోక విగ్రహమ్ ll
నిక్వణన్మనోజ్ఞ హేమకింకిణీ లసత్కటిం l
కాశికాపురాధి నాథ కాలభైరవం భజే ll 4 ||
అర్దం:-
భుక్తి - ముక్తులనిచ్చువాడు, ప్రశస్తమైన సుందర శరీరము కలవాడు, భక్తవత్సలుడు, స్థిరమైనవాడు సమస్త ప్రపంచమును నిగ్ర హించువాడు, నడుము నందు మోగుచున్న అందమైన బంగారు చిరుగంటలు ధరించినవాడు, కాశీనగరమునకు అధిపతియైన కాలభైరవుని సేవించుచున్నాను.(4)


ధర్మసేతుపాలకం త్వధర్మమార్గనాశకం l
కర్మపాశమోచకం సుశర్మదాయకం విభుమ్ ll
స్వర్ణవర్ణ కేశపాశ శోభితాంగనిర్మలం l
కాశికాపురాధి నాథ కాలభైరవం భజే ll 5 ||
అర్దం:-
ధర్మమును రక్షించువాడు, అధర్మమును నాశనం చేయువాడు, కర్మ పాశములను విడిపించువాడు, సుఖమునిచ్చువాడు, అంతటా వ్యాపించినవాడు, బంగారు వన్నెకలకేశ పాశములతో శోభిల్లు నిర్మల శరీరుడు, కాశీనగరమునకు అధిపతియైన కాలభైరవుని సేవించుచున్నాను.(5)


రత్నపాదుకాప్రభాభిరామ పాదయుగ్మకం l
నిత్యమద్వితీయమిష్టదైవతం నిరంజనమ్ ll
మృత్యుదర్పనాశనం కరాళదంష్ట్రభూషణం l
కాశికాపురాధి నాథ కాలభైరవం భజే ll 6 ||
అర్దం:-
అందమైన పాదములందు రత్న పాదుకలను ధరించినవాడు, నిత్యుడు, అద్వితీయుడు, ఇష్టదైవము, నిరంజనుడు, యముని అహంకారమును నాశనం చేసినవాడు, భయంకరమైన కోరలు ఆభరణములుగా కలవాడు, కాశీనగరమునకు అధిపతియైన కాలభైరవుని సేవించుచున్నాను.(6)


అట్టహాసభిన్న పద్మజాండకోశసంతతిం l
దృష్టిపాతనష్ట పాపజాలముగ్రశాశనమ్ ll
అష్టశిద్ధిదాయకం కపాలమాలికాధరం l
కాశికాపురాధి నాథ కాలభైరవం భజే ll 7 ||
అర్దం:-
అట్టహాసముతో బ్రహ్మాండములను బద్దలు చేయువాడు, చూపుతో పాపములను తొలగించువాడు, ఉగ్రముగా శాసించువాడు, అష్టసిద్ధులను ప్రసాదించువాడు, కపాలమాల ధరించినవాడు, కాశీనగరమునకు అధిపతియైన కాలభైరవుని సేవించుచున్నాను.(7)


భూతసంఘనాయకం విశాలకీర్తి దాయకం l
కాశివాసిలోకపుణ్య పాపశోధకం విభుమ్ ll
నీతిమార్గకోవిదం పురాతనం జగత్ప్రభుం l
కాశికాపురాధి నాథ కాలభైరవం భజే ll 8 ||
అర్దం:-
భూతనాయకుడు, విశాలమైన కీర్తి కలిగించువాడు, కాశీలో నివశించు వారి పుణ్యపాపములను శోధించువాడు, సర్వవ్యాపి నీతిమార్గపండితుడు, పురాతనుడు, ప్రపంచ రక్షకుడు, కాశీనగరమునకు అధిపతియైన కాలభైరవుని సేవించుచున్నాను.(8)


కాలభైరవాష్టకం పఠంతి యే మనోహరం l
జ్ఞానముక్తిసాధనం విచిత్రపుణ్యవర్ధనమ్ ll
శోకమోహదైన్యలోభకోపతాపనాశనం l
తే ప్రయాంతి కాలభైరవాంఘ్రిసన్నిధిం ధ్రువమ్ ll
అర్దం:-
మనోహరమైనది, జ్ఞానమును, ముక్తిని కలిగించునది, అనేక పుణ్యములను పెంపొందించునది, శోకము- మోహము - దీనత్వం - కోపం - పాపములను - నశింపచేయునది అగు కాలభైరవాష్టకం పాటించు వారు నిశ్చయముగా కాలభైరవపాదసన్నిధిని చేరెదరు.


కాలభైరవాష్టకం అర్దం YouTube లో raghava reddy videos నుండి తీసుకోవడం జరిగింది.


Chandu bharadwaj